ഉടൽഗന്ധങ്ങൾ

സർപ്പങ്ങളങ്ങനെയുമുണ്ട് ,
വാടിയ ഇലഞ്ഞിപ്പൂ ഗന്ധമുള്ളവ ..
പർപ്പടകപ്പുല്ലിൽ തീപിടിക്കും മണമുള്ളവ ...
ഊറ്റിവാരിയുടച്ച മധുരക്കപ്പവാസനയുള്ളവ ...
അന്തിക്കാറ്റു കെടുത്തിയ പടിപ്പുരത്തിരി മണക്കുന്നവ ..

പക്ഷേ പെണ്ണുടൽ ഗന്ധമുള്ള സർപ്പമാണ് ഞാൻ !

പടംപൊഴിച്ചുയിർക്കുമ്പോഴൊക്കെയും
മാറിമറിയുന്ന ഉടൽഗന്ധങ്ങൾ .


വാസനിച്ചു വാസനിച്ചൊടുക്കം എന്റെ ഗന്ധങ്ങൾ
നിന്നെ അകപ്പെടുത്തുകയാണ് .

സർപ്പഗന്ധമേറ്റുവാങ്ങുകയെന്നാൽ
ഇന്ദ്രിയസൗഖ്യം നിലച്ചുപോവുകയെന്നുമാണ്  .
കാഴ്ചയ്‌ക്കൊപ്പം കേൾവിയും
വാക്കുകൾക്കൊപ്പം സ്പർശവും
ഒടുക്കം
അകപ്പെടുത്തിയ ഗന്ധം തന്നെയുമില്ലാതാവും .

രക്ഷപ്പെടാനുള്ള വാതിലുകൾ തുറന്നു കിടക്കട്ടെ !!