ദുപ്പട്ടത്തുമ്പാൽ കുരുക്കിടുമ്പോൾ ഞരമ്പ്‌ തെറ്റരുത് ...തെറ്റിയാൽ ....ഓർമ്മ പോകും ....

ഇന്നലെ രാത്രി നടക്കാനിറങ്ങുമ്പോൾ
ഇടാൻ മറന്ന ""ഉത്തരീയ""മെടുക്കാൻ
തിരികെക്കയറിയ ഹൃദയം വെറുതെയോർത്തത്
പണ്ട് റേഡിയോ പരിപാടിയിൽ വിളിച്ച ഒരുചേച്ചിയുടെ
വാക്കുകൾ ......

"" രാവിലെ നടക്കാനിറങ്ങാൻ നിവൃത്തിയില്ല
പോണ വഴിയിലൊരു ചായക്കട ..അവിടത്തെ അമ്മച്ചി ....
കാണുമ്പോഴേ തെറി വിളി തുടങ്ങും ...
""ഓരോ അവളുമാര് നെഞ്ചും തള്ളിപ്പിടിച്ചോണ്ടിറങ്ങും
ആണുങ്ങളെ വളയ്ക്കാൻ ....""
ഇങ്ങനെ തുടക്കം ....
ഒടുക്കം കാലടിച്ചൊടിക്കുമെന്ന് ഭീഷണി ...""
ചേച്ചി റൂട്ട് മാറ്റി ...
വാഹനമില്ലാത്തൊരു റോഡു തേടി വലഞ്ഞു ...
ഹൃദ്രോഗിയാണ്‌ ....ശ്വാസം മുട്ടുമുണ്ട് ...
അധികം പൊടിയടിക്കാൻ പാടില്ല ...
നടക്കാനിറങ്ങുമ്പോ കൈവീശി നടക്കണമെന്ന് ഡോക്ടർ ...
അസൗകര്യം കാരണം ഷാൾ ഒഴിവാക്കും ...
അതാണ്‌ നമ്മുടെ അമ്മച്ചിയുടെ
സ്വൈര്യം കെടുത്തുന്നത് ....!!!!

മൂടിപ്പുതച്ചു തിരികെയിറങ്ങുമ്പോൾ
മരുഭൂമി ചൂടിൽ വിയർത്തു വിളർത്ത ഹൃദയം
കഞ്ഞീം കറീം വയ്ക്കാനോടി ...!!!

വേലിപത്തലൊടിച്ചു വീടുകെട്ടി
ചിരട്ടയിൽ മണ്‍ ചോറ് വിളമ്പുമ്പോൾ
ശ്യാമുണ്ണിയച്ഛൻ പറഞ്ഞു ...
""ടീ , അമ്മയ്ക്ക് സാരി വേണം ....""
അവനോടിയൊപ്പിച്ചെടുത്ത മഞ്ഞ ദുപ്പട്ട
പാവാടയിൽ ചുറ്റി അന്ന് ഗമയിൽ നില്ക്കുമ്പോഴോർത്തില്ല
ദുപ്പട്ടയെന്ന രണ്ടു മീറ്ററിന്
അർത്ഥങ്ങൾ പലതെന്ന് !!!

പതിമൂന്നാം വയസ്സിൽ പെറ്റിക്കോട്ട് പിടിച്ചു വലിച്ചു മടുത്ത്
കണ്ണാടി നോക്കി സ്വയം ശപിക്കുമ്പോൾ
""കുമാരീ ഹൃദയം "" ചോദിച്ചു ....
ശെ ...ഇതെന്താ ഇങ്ങനെ??
ഒപ്പം പഠിച്ച ലേഖ അർത്ഥം വച്ച് ചിരിച്ചപ്പോൾ
അവളുടെ ശംഖു കഴുത്തു പിടിച്ചു ഞെരിക്കാൻ
തോന്നിപ്പോയി ഹൃദയത്തിന് ...!!
ഒടുക്കം ,
വെള്ള പെറ്റിക്കോട്ടു ചോപ്പിച്ചു പാവാടയും കടന്നു
ബെഞ്ചിലെത്തി നിന്ന പ്രായം
അവളുടെ മെറൂണ്‍ ഷാൾ ഒപ്പിയെടുത്തയന്നാണ്
ഹൃദയം പശ്ചാത്താപ വിവശയായത് !!!

പിന്നെ ,
യുണിഫോം ദുപ്പട്ടയുടെ മെറൂണ്‍ നിറഭേദങ്ങൾ
പഴയ സ്കൂൾ ഫോട്ടോയിൽ നിരന്നിരുന്നു ചിരിച്ചു ....!

കോളേജിൽ നീല പട്ടുപാവാടയണിയാൻ കൊതിച്ച
ഓണക്കാലത്ത്
പട്ടിന്റെ ഭംഗി ചോർത്തി നെഞ്ചോട്‌ ചേർത്ത് പിടിച്ച
കടും നീല ഫയൽ !!
മരച്ചോട്ടിലെ ""കരിനീല "" ആണ്‍നോട്ടങ്ങൾ ....
""നീല "" മാത്രം തുപ്പിയ കമന്റുകൾ ....!!
അതിൽപ്പിന്നെ പാവാടയും ഫയലും
അലമാരയ്ക്കുള്ളിൽ പൊടിപിടിച്ചു മരിച്ചു ...!

""ഫോർത്ത് എസ്റ്റേറ്റ്‌ ""എന്നെഴുതിയ വാതിൽപ്പാളിയ്ക്കിടയിൽ
കുടുങ്ങിയ സന്ദീപിന്റെ ചെറുവിരൽ ....
നഖമുനയിലെ ചോരച്ചെമപ്പു തുടച്ചെടുത്ത
വെളുത്ത പരുക്കൻ ദുപ്പട്ട ....
ഗുൽമോഹറിന്റെ പ്രണയച്ചോപ്പിനു താഴെ
അവനുറങ്ങിക്കിടക്കുമ്പോൾ
നോക്കി നിന്ന് കണ്ണ് തുടച്ചതും
അതേ വെളുത്ത പരുക്കൻ ദുപ്പട്ട !!!

പീഡന പർവ്വത്തിനൊടുവിൽ കലങ്ങിയ കണ്ണുമായി
കോടതി വരാന്തയിൽ റീനു ....
ഒരു മാസം മുൻപ് , ദുപ്പട്ടക്കുരുക്ക് മുദ്ര വച്ച
കഴുത്തിലൂടെ വിയർപ്പു ചാലിട്ടൊഴുകി ....
മങ്ങിയ പിങ്ക് ദുപ്പട്ടയിൽ ചുറ്റിയഴിഞ്ഞ
അവളുടെ നീണ്ട വിരലുകൾ ....
(പെണ്ണു കണ്ട ദിവസത്തെ പോലെ ...)

മുറിയ്ക്കുള്ളിൽ വാദപ്രതിവാദ ഘോഷം ....
ഒക്കെക്കഴിഞ്ഞിറങ്ങുമ്പോൾ
പിങ്ക്നിറ ദുപ്പട്ടതുമ്പ് മായ്ച്ച
ചുവന്ന സിന്ദൂരത്തരികൾ ...!!
കോടതി മുറ്റത്തെ മന്ദാരക്കൊമ്പത്ത്
ഓറഞ്ചു സൂര്യൻ ചിരിച്ചു ....!!

റോഡുവക്കിൽ കുരിശടിയ്ക്ക് മുന്നിൽ
പൊന്തയിലൊരു തുണിക്കെട്ട് ....!!
ഒരു വയലറ്റ് ദുപ്പട്ട ....!
അനക്കമറിഞ്ഞു ചിലർ എത്തി നോക്കുമ്പോൾ
ദുപ്പട്ടത്തൊങ്ങൽ വായിൽത്തിരുകി
""വയലറ്റ് മുഖ ""ക്കുഞ്ഞ് !!!
കുഞ്ഞു വയലറ്റ് ഞരമ്പുകൾ കഴുത്തിൽ
തുടിതുടിച്ചു .....
പിന്നെ ,
അമ്മത്തൊട്ടിൽച്ചൂടിൽ വയലറ്റു പുതപ്പിനുള്ളിൽ
അവൾ ചിരിച്ചുറങ്ങി .....!!

ഓർമ്മപ്പൊള്ളലുകളിൽ വെന്ത ഹൃദയം
മുറിയ്ക്കുള്ളിലേയ്ക്ക് തിരികെയോടിക്കയറി !!!
കഴുത്തു ചുറ്റി പറ്റിക്കൂടിയിരുന്ന ബ്രൌണ്‍ ദുപ്പട്ട
നിലത്തു വീണു നിലവിളിച്ചു ....!!

നടന്നു നീങ്ങുമ്പോൾ വഴിയരികിൽ
പല്ലുകുത്തി നിന്ന പച്ചയുടെ ""പച്ച "" നോട്ടം ...
തിരിഞ്ഞു നിന്ന് നോക്കുമ്പോൾ
അസ്വസ്ഥതയോടെ പിൻവലിക്കപ്പെട്ട
അയാളുടെ കണ്ണുകൾ !!

പൊടുന്നനെ വീശിയടിച്ച കാറ്റിൽ
ഹൃദയമൊന്നു പൊട്ടിച്ചിരിച്ചു ...
പിന്നെ , ഇരുകൈകളും വീശി നടപ്പ് തുടർന്നു ....!!!

പിൻകുറിപ്പ് :
വിജനമായ പാളത്തിനരികിലെ കുറ്റിക്കാടുകൾക്കിടയിൽ
ഉറുമ്പരിച്ചൊരു കീഴ്ച്ചുണ്ടിനൊപ്പം
തൊട്ടാവാടി മുള്ളിൽ കുടുങ്ങിക്കിടന്നത്
ചോന്ന ദുപ്പട്ടയിലെ നക്ഷത്രത്തുണ്ട് !!!
ഒടുക്കം ,
ചുണ്ടേത് ? തുണ്ടേത് ?
എന്ന ചോദ്യം ബാക്കി .....!!!!