അതിലും ഭേദം

ദീർഘനേരം നീണ്ടു നില്ക്കുന്ന ചില സംഭാഷണങ്ങളെ
ഹൃദയം വെറുക്കുന്നു ...
അതിലും ഭേദം
മൗനമുറഞ്ഞൊരു നോട്ടമാണ് !

ദീർഘനേരം നീണ്ടു നില്ക്കുന്ന ചില ആലിംഗനങ്ങളെ
ഹൃദയം വെറുക്കുന്നു ..
അതിലും നല്ലത്
ഹ്രസ്വവും ചടുലവുമായൊരു സ്പർശനമാണ്‌ !

ദീർഘനേരം നീണ്ടു നില്ക്കുന്ന ചില പൊട്ടിച്ചിരികളെ
ഹൃദയം വെറുക്കുന്നു ...
അതിലും നന്ന്
ആത്മാവ് കവരുന്നൊരു പുഞ്ചിരിയാണ് !

ദീർഘനേരം നീണ്ടു നില്ക്കുന്ന ചില സമാഗമങ്ങളെ
ഹൃദയം വെറുക്കുന്നു ...
അതിലും ഭേദം
കരളു പറിച്ചെടുത്തു കണ്ണ് നിറഞ്ഞൊരു വേർപിരിയലാണ് !

ദീർഘനേരം നീണ്ടു നില്ക്കുന്ന ചില സൗഹൃദങ്ങളെ
ഹൃദയം വെറുക്കുന്നു ...
അതിലും നല്ലത്
എന്നോ പിരിഞ്ഞ കാണാച്ചങ്ങാത്തമാണ് !

ദീർഘനേരം നീണ്ടു നില്ക്കുന്ന ചില ചുംബനങ്ങളെ
ഹൃദയം വെറുക്കുന്നു ...
അതിലും നന്ന്
സ്നേഹച്ചൂടുള്ളൊരു ചാവുചുംബനം തന്നെ !!!